နှစ်လေးဆယ်ကျော်
တအာင်းစာ… ကစားမလား နားမလား… သတိနဲ့သွား
၄၀ ကျော်မှ ဘဝ စတယ်ဆိုရင်…
တအာင်းစာပေ ဘဝစတာ မကြာသေးဘူးပေါ့။
၁၉၈၉… တချိန်တုန်းက ကျောက်မဲမှာပေါ့…
ပံပ်အူ ပံပ်အာရ် လာသင်ကြားတော့
ငါလည်းကြားညှပ် တဝက်တပျက် အလွတ်ကျက်ခဲ့ဖူးတယ်။
ငါ့လိုပါပဲ အခြားလူလည်း…
ဒီလိုနဲ့ ငါ့ဘော်ဒါတချို့ နဲ့ငါ
ပံပ်အူ ပံပ်အာရ်ကြားမှာနစ်
အခုထက်ထိကျမ်းမကြေနိုင်သေးဘူး။
ငါ့လိုပါပဲ ပံပ်အူပံပ်အာရ်လည်း… အနှစ်လေးဆယ်ကျော်
သူ့ကိုကျော်နိုင်တဲ့ စာသင်ကျမ်းမရှိနိုင်သေးဘူး။
အခုတော့ မြန်မာအစိုးရ သဘောထားကြီးမှုနဲ့
ရူမာည်းတအာင်း သင်ရိုးညွှန်းတမ်း
ဆာမ်လုမ်တအာင်း သင်ရိုးညွှန်းတမ်း အစီအရီထွက်
ငါ့တူမငယ်တွေ ထပ်အလွတ်ကျက်ရတော့မယ်။
ညအခါ လသာသာ…ကို
ရူမာည်းလို သရ နဲနဲပါအောင် ဘယ်လိုဘာသာပြန်ပြီး
ငါးနှစ်အရွယ် ငါ့တူမကို သင်ကြားမလဲ
ငါတွေးပူမိတယ်။
တိုင်းရင်းသားတွေကိုသတ်ဖြတ် နယ်ချဲ့အင်ပါယာထူခဲ့တဲ့
ဗမာစစ်သူရဲကောင်းအကြောင်း သူကောင်းပြုပြီး
ဆာမ်လုမ်လို ဘာသာသွင်း
ဆယ်နှစ်အရွယ် ငါ့တူလေးဦးနှောက်ထဲ ဘယ်လိုချွတ်ယွင်းမလဲ
ငါစဉ်းစားရကြပ်တယ်။
အော်… ငါတို့လက်ထပ် ပံပ်အူပံပ်အာရ်ထက်
တဆင့်မြင့်
အခုတော့ သင်ရိုးညွှန်းတမ်းသစ်တွေဖြစ်လာတာ
ငါစိတ်မညစ်ချင်ပါဘူး
တအာင်းစာပေယဉ်ကျေးမှုကော်မတီ ကြီးကိုပဲ
ကျေကျေနပ်နပ်ကြီး ကျေးဇူးတင်လိုက်တော့မယ်။
တကယ်တမ်းတော့…
တအာင်းစာကို တအာင်းလူမျိုးတိုင်း တတ်မြောက်အသုံးပြုဖို့
ဆိုတာ…
ငါ…
မင်း…
ငါတို့…
သူတို့…
တအာင်းအားလုံးကို… လက်ညှိူးထိုးလိုက်တာ
အသေချာဆုံးပဲ။
ကဲ… ဘာဆက်လုပ်မလဲ
ကစားမလား၊ နားမလား။
တအာင်းစာပေ နှစ်လေးဆယ်ကျော်…
သတိနဲ့သွား။………..။
ဖိူမ်ငါမ်(ကုင်ဆိုရ်မျံမ်)
၂၂-၀၈-၂၀၁၄
(၂၃း၅၀ နာရီ)
(သြဂုတ် ၃၀ တအာင်းစာပေနေ့ကို ဦးညွတ်လျှက်)
No comments:
Post a Comment